1ܒܲܣ ܟܲܕ ܡܫܝܼܚܵܐ ܩܘܼܒܸܠܹܗ ܚܲܫܵܐ ܡܒܵܕܵܠܲܢ ܒܒܸܣܪܵܐ؛ ܐܘܼܦ ܐܲܚܬܘܿܢ ܗܲܪ ܒܐܵܗܵܐ ܚܝܼܵܠ ܟ̰ܲܟܒܸܢܘܿܢ ܓܵܢܵܘܟܼܘܿܢ؛ ܣܵܒܵܒ ܗ̇ܘ ܕܩܘܼܒܠܵܐ ܝ݇ܠܹܗ ܚܲܫܵܐ ܒܦܲܓܼܪܹܗ ܫܸܠܝܵܐ ܝ݇ܠܹܗ ܡ̣ܢ ܚܛܝܼܬܵܐ؛ 2ܕܠܵܐ ܡܐܵܕܝܼܵܐ ܚܲܝܹܐ ܠܫܲܗ̈ܘܲܬܝܵܬܹܐ ܕܒܢܲܝ̈ܢܵܫܵܐ؛ ܟܡܵܐ ܙܲܒܼܢܵܐ ܕܝܼܠܹܗ ܒܦܲܓܼܪܵܐ ܐܸܠܵܐ ܠܪܸܙܵܝܵܐ ܕܐܲܠܵܗܵܐ. 3ܣܵܒܵܒ ܕܟܹܐ ܡܵܠܹܐ ܙܲܒܼܢܵܐ ܕܥܒܼܸܪܹܗ ܠܸܦܠܵܚܵܐ ܒܝܼܹܗ ܪܸܙܵܝܵܐ ܕܛܵܝܸܦܹ̈ܐ؛ ܟܲܕ ܒܲܚܕܵܪܵܐ ܒܦܲܚܙܘܼܬܵܐ؛ ܒܫܲܗ݇ܘܲܬܝܵܬܹ̈ܐ. ܒܪܵܘܵܝܘܼܬܵܐ؛ ܒܙܡܵܪܵܐ؛ ܒܫܬܵܝܵܬܹ̈ܐ؛ ܘܒܦܘܼܠܚܵܢܹ̈ܐ ܒܝܼܫܹ̈ܐ ܕܨܵܢܲܡܹ̈ܐ. 4ܘܗܵܐ ܐܵܕܝܼܵܐ ܥܵܓ̰ܘܿܒܹܐ ܝ݇ܢܵܐ؛ ܘܒܸܓܕܵܦܵܐ ܝ݇ܢܵܐ ܥܲܠܵܘܟܼܘܿܢ؛ ܣܵܒܵܒ ܠܹܐ ܪܵܚܛܝܼܬܘܿܢ ܥܲܡܵܝܗܝ ܗܲܪ ܒܗ̇ܘ ܗܲܕ ܕܐܵܣܘܿܛܘܼܬܵܐ. 5ܘܒܸܬ ܝܵܗ݇ܒܼܝܼ ܓ̰ܘܼܘܵܒ ܠܗ̇ܘ ܕܗܕܝܼܪܵܐ ܝ݇ܠܹܗ ܠܸܕܝܵܢܵܐ ܡܝܼܬܹ̈ܐ ܘܚܵܝܹ̈ܐ. 6ܣܵܒܵܒ ܠܕܵܐܗܵܐ ܦܸܫܠܵܗ̇ ܡܘܼܫܚܸܕܬܵܐ ܐܹܘܵܢܓܵܠܝܼܘܿܢ ܐܘܼܦ ܠܡܝܼܬܹ̈ܐ؛ ܕܦܵܝܫܝܼ ܕܝܼܢܹܐ ܐܲܝܟܼ ܒܢܲܝ̈ܢܵܫܵܐ ܒܒܸܣܪܵܐ؛ ܕܚܲܝܝܼ ܒܐܲܠܵܗܵܐ ܒܪܘܼܚܵܐ. 7ܐܝܼܢܵܐ ܡܛܝܼܬܵܐ ܝ݇ܠܵܗ̇ ܚܲܪܬܵܐ ܕܟܠ. ܣܵܒܵܒ ܕܐܵܗܵܐ ܗ݇ܘܹܡܘܿܢ ܡܵܪܹ̈ܐ ܗܵܘܢܵܐ ܨܵܚ؛ ܘܦܘܼܫܘܿܢ ܪܥܝܼܫܹܐ ܠܨܠܘܿܬܵܐ. 8ܘܩܵܕ݇ܡ ܟܠ ܡܸܢܕܝܼ ܚܘܼܒܵܐ ܚܵܪܝܼܦܵܐ ܠܟܸܣ ܥܘܼܕܵܠܹܐ ܗܵܘܹܐ ܠܵܘܟܼܘܿܢ؛ ܣܵܒܵܒ ܚܘܼܒܵܐ ܟܹܐ ܡܲܟܸܣ ܒܘܼܫܵܝܘܼܬܵܐ ܕܚܛܝܼܵܬܹ̈ܐ. 9ܘܥܒܼܘܿܕܘܿܢ ܡܵܘܗܘܼܒܲܬ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܕܠܵܐ ܛܲܪܛܲܡܬܵܐ. 10ܘܟܠ ܐ݇ܢܵܫܵܐ ܡܸܢܵܘܟܼܘܿܢ ܐܲܝܟܼ ܚܲܠܥܲܬ ܕܩܘܼܒܸܠܹܗ ܥܵܒܼܸܕ ܚܸܠܡܲܬ ܒܝܼܵܗ̇ ܠܚܲܒܼܪ̈ܵܘܵܬܘܼܗܝ؛ ܐܲܝܟܼ ܢܵܙܝܼܪܹ̈ܐ ܛܵܒܼܹ̈ܐ ܕܫܵܦܵܩܲܬ ܦܪܝܼܫܬܵܐ ܕܐܲܠܵܗܵܐ؛ 11ܐܸܢ ܐ݇ܢܵܫܵܐ ܗܲܡܙܸܡ؛ ܐܸܢ ܐ݇ܢܵܫܵܐ ܥܵܒܼܸܕ ܚܸܠܡܲܬ؛ ܐܲܝܟܼ ܕܡ̣ܢ ܚܲܝܠܵܐ ܕܐܲܠܵܗܵܐ ܒܝܼܲܕ ܝܼܫܘܿܥ ܡܫܝܼܚܵܐ؛ ܗ̇ܘ ܕܕܝܼܹܗ ܝ݇ܠܵܗ̇ ܬܸܫܒܘܿܚܬܵܐ ܘܗܘܼܟܡܵܐ ܠܥܵܠܡܹ̈ܐ ܕܥܵܠܡܹ̈ܐ؛ ܐܵܡܹܝܢ 12ܡܘܼܚܸܒ̈ܝܼ؛ ܠܵܐ ܥܵܓ̰ܒܝܼܬܘܿܢ ܒܓ̰ܘܼܪܵܒܵܐ ܢܘܼܪܵܢܵܐ ܕܗܵܘܹܐ ܠܵܘܟܼܘܿܢ ܠܒܵܚܲܪܬܵܘܟܼܘܿܢ؛ ܐܲܝܟܼ ܕܡܸܢܕܝܼ ܢܘܼܟܼܪܵܝܵܐ ܩܲܘܸܡ ܐܸܠܵܘܟܼܘܿܢ. 13ܐܸܠܵܐ ܚܕܹܡܘܿܢ ܟܡܵܐ ܕܫܲܪܸܟܝܼܬܘܿܢ ܒܚܲܫܹ̈ܐ ܕܡܫܝܼܚܵܐ؛ ܕܗܲܕܟܼܵܐ ܐܘܼܦ ܒܓܸܠܝܵܢܵܐ ܕܸܫܒܘܿܚܬܹܗ ܚܵܕܝܼܬܘܿܢ ܘܦܵܨܚܝܼܬܘܿܢ. 14ܐܸܢ ܦܵܝܫܝܼܬܘܿܢ ܠܝܼܡܹܐ ܒܚܵܬܸܪ ܕܫܸܡܹܗ ܕܡܫܝܼܚܵܐ؛ ܛܘܼܒܼܵܐ ܐܸܠܵܘܟܼܘܿܢ؛ ܕܪܘܼܚܵܐ ܕܚܸܩܪܵܐ ܘܕܲܐܠܵܗܵܐ ܒܸܢܝܵܚܵܐ ܝ݇ܠܵܗ̇ ܥܲܠܵܘܟܼܘܿܢ. 15ܐܝܼܢܵܐ ܠܵܐ ܐ݇ܢܵܫܵܐ ܡܸܢܵܘܟܼܘܿܢ ܗܵܘܹܐ ܒܸܩܒܵܠܵܐ ܚܲܫܵܐ ܐܲܝܟܼ ܩܵܛܘܿܠܵܐ؛ ܝܲܢ ܐܝܟܼ ܓܹܢܵܒܼܵܐ؛ ܝܲܢ ܐܲܝܟܼ ܥܵܒܼܕܵܢܵܐ ܕܒܝܼܫܬܵܐ؛ ܝܲܢ ܐܲܝܟܼ ܚܵܒܼܛܵܢܵܐ ܒܫܘܼܠܹ̈ܐ ܕܐ݇ܚܹܪ̈݇ܢܹܐ. 16ܐܝܼܢܵܐ ܐܸܢ ܩܲܒܸ̇ܠ ܚܲܫܵܐ ܐܲܝܟܼ ܟܪܸܣܛܝܵܢܵܐ؛ ܠܵܐ ܢܵܚܸܦ؛ ܐܸܠܵܐ ܫܵܒܸܚ ܠܐܲܠܵܗܵܐ ܗܲܪ ܒܐܵܗܵܐ ܩܸܨܲܬ. 17ܣܵܒܵܒ ܙܲܒܼܢܵܐ ܝ݇ܠܹܗ ܕܫܵܪܝܵܐ ܕܝܼܘܵܢ ܡ̣ܢ ܒܲܝܬܹܗ ܕܐܲܠܵܗܵܐ. ܐܝܼܢܵܐ ܐܸܢ ܡܸܢܲܢ ܫܵܪܝܵܐ؛ ܡܘܼܕܝܼ ܝ݇ܠܵܗ̇ ܚܲܪܬܵܐ ܕܐܵܢܝܼ ܕܠܹܐ ܡܲܨܝܸܬܝܼ ܠܡܲܫܚܲܕܬܹܗ ܕܐܲܠܵܗܵܐ؛ 18ܘܐܸܢ ܙܲܕܝܼܩܵܐ ܒܟ̰ܵܬܘܿܢܘܼܬܵܐ ܚܲܝܹܐ؛ ܪܲܫܝܼܥܵܐ ܘܚܲܛܵܝܵܐ ܐܲܝܟܵܐ ܡܵܫ݇ܟ̰ܸܚ؛ 19ܣܵܒܵܒ ܕܐܵܗܵܐ ܐܵܢܝܼ ܕܩܵܒܠܝܼ ܚܲܫܵܐ ܐܲܝܟܼ ܪܸܙܵܝܹܗ ܕܐܲܠܵܗܵܐ؛ ܣܵܦܝܼ ܓܵܢܵܬܵܝ̈ܗܝ ܒܦܘܼܠܚܵܢܹ̈ܐ ܛܵܒܼܹ̈ܐ ܐܲܝܟܼ ܕܠܒܵܪܝܵܢܵܐ ܡܗܘܼܡܢܵܐ.